eTwinning: Leading 21st Century Schools, Berlín, 10.-12. nóvember 2011

Við vorum fjögur frá Íslandi sem fórum á ráðstefnu um eTwinning: Leading 21st Century Schools í Berlín 10.-12. nóvember 2011. Það voru Kolfinna Jóhannesdóttir frá Menntaskóla Borgarfjarðar, Lára Stefánsdóttir Menntaskólanum á Tröllaskaga, Friðþjófur Helgi Karlsson frá Smáraskóla og  Kristrún Guðbjörg Guðmundsdóttir frá Hlíðaskóla. Ráðstefnan samanstóð af fyrirlestrum, vinnustofum og pallborðsumræðum og var frábær í alla staði. 

Fyrsta daginn var lykilfyrirlesturinn haldinn af Tapio Säävälä sem er yfirmaður “School Policy”, hjá Evrópusambandinu í deild sem fjallar um menntun og menningu. Þar er áhersla lögð á samstarf milli landanna sem eiga aðild að ESB en Ísland á fulla aðild að menntahluta Evrópusambandsins í gegnum EES samninginn.

Næsti dagur byrjaði á vinnustofum og skiptum við okkur á tvær vinnustofur. Kolfinna og Kristrún fóru í vinnustofu hjá Jan Fazlagic frá Háskólanum í Poznan í Póllandi. Lára og Friðþjófur fóru á þá vinnustofu síðar enda voru vinnustofurnar endurteknar. Vinnustofan fjallaði um hlutverk stjórnenda sem leiðtoga í skólastarfi. Jan lagði áherslu á mikilvægi leiðtogans í skólastarfi. Hann bar saman eldri kenningar og nýrri hugmyndir um nálgun stjórnandans í skólastarfi.   Hann lagði áherslu á að menn horfðu á hegðun og líðan fremur en ferla.

Við fórum einnig í vinnustofu hjá Jens Bolhöfer frá Lower Saxony State stofnuninni fyrir kennaramenntun og skólaþróun. Jens talaði um samskiptanet leiðtoga í skólum. Hann sagði þessi net fjögur, pólitískt og menningarlegt, kennara í skólum, skipulag og persónulega þróun og vöxt í starfi. Hann taldi mikilvægt að kennarar hefðu hæfileika til að breytast og þróast í takt við tímann og brúa þyrfti gap milli þess sem nemendur upplifðu í skólunum og lífsins utan hans.

Annar dagurinn byrjaði á lykilfyrirlestri Anne Gilleran ráðgjafa hjá Evrópska skólanetinu. Hún stýrir kennslufræðihlutfa eTwinning verkefni en í því eru nú ríflega 14 þúsund þátttakendur. Fyrirlesturinn fjallaði um leiðina að námssamfélaginu. Hún talaði um hugmyndafræðina að baki eTwinning og hvernig við gætum notað þetta tæki til faglegrar þróunar kennara og nemenda með samskiptum og samstarfi.   Fram kom í máli hennar áhersla Evrópusambandsins á eflingu náms í Evrópu í gegnum samstarf.  Rannsóknir sýna að samstarf eflir námsárangur og skólastarf eins og kom fram í máli David Istance frá OECD síðasta daginn. Fram kom í máli þátttakenda að þeir vildu að fjármagn væri sett í eTwinning til að gera þáttakendum kleift að hittast öðru hvoru.

Vinnustofurnar þennan dag voru mjög áhugaverðar en þær fjölluðu m.a. um að opna skólastarf fyrir nærumhverfinu (Ulrike Wiedersich), samskiptanet kennara framtíðarinnar (Romina Cachia), áhrif skólastjórnenda í tengslum við nýja tækni (Patricia Wastiau), ásamt nánari útlistun Anne Gilleran á eTwinning.

Síðasti dagurinn hófst á stórkostlegum fyrirlestri David Istance sem fjallaði um rannsóknir og þróunarvinnu OECD og þeirra sýn á hvernig skólar þyrftu að þróast til að ná árangri. Hann lagði áherslu á námsárangur og árangursríkar kennsluaðferðir og taldi mikilvægt að brjóta niður skipulagið, kennari – kennarastofa – nemendur-kennslustofa, til að ná árangri í að virkja nemendur. Hann sagði samvinnu mikilvæga bæði milli kennara og nemenda, kennarar mættu ekki vera einyrkjar heldur yrðu þeir að miðla þekkingu og reynslu, spegla sig hver í öðrum. Hann taldi eTwinning eitt af þeim verkfærum sem hægt væri að nota til að ná þessum markmiðum.

Við viljum þakka fyrir það tækifæri að geta komist á þessa frábæru ráðstefnu, við lærðum mikið og margt sem varð okkur kveikja að hugmyndum. Við mynduðum góð tengsl við skólastjórnendur víða að úr Evrópu. Margir leituðu til okkar Íslendinga og lýstu yfir áhuga á samstarfi í gegnum eTwinning og Comenius. Kærar þakkir fyrir okkur.

Friðþjófur Helgi Karlsson, Smáraskóla
Kolfinna Jóhannesdóttir, Menntaskóla Borgarfjarðar
Kristrún Guðbjörg Guðmundsdóttir, Hlíðaskóla
Lára Stefánsdóttir, Menntaskólanum á Tröllaskaga

Frábær dagur á Grundarfirði

Sælir eTwinnarar.

Í dag var ég á Grundarfirði og kynnti þar eTwinning í Fjölbrautaskóla Snæfellinga og Grunnskóla Grundarfjarðar. Kynningarnar gengu vel og allir kennararnir voru mjög áhugasamir. Fólk var sammála um að eTwinning væri áhugaverður vettvangur til þess að eiga samskipti við aðra kennara í Evrópu og til þess að gera verkefni með þeim og nemendum þeirra. Endurmenntunarhluti eTwinning vakti einnig athygli sem og gagnabankinn sem þar er að finna.

Það var gaman að koma til Grundarfjarðar og fékk ég mjög góðar móttökur hjá kennurum Fjölbrautaskóla Snæfellinga og Grunnskóla Grundarfjarðar.

Bestu kveðjur,

Guðný Ester

Mentor - Iceland 2011

Heil og sæl, eTwinnarar,

ég setti upp spjallstofu (Teachers Room) á eTwinning  - Mentor -Iceland 2011 - ætlaða íslenskum eTwinnurum sem vilja fá aðstoð. Spjallstofan er á íslensku til þess að tungumálið þvælist nú örugglega ekki fyrir. Mig langar til þess að fá sem flesta íslenska eTwinning leiðbeinendur eða Mentora inn í spjallstofuna og auðvitað alla landsbyggðarfulltrúana til þess að tryggja að ávallt sé einhver fyrir hendi sem svarar fyrirspurnum og aðstoðar. Við getum síðan bent á spjallstofuna í skólakynningunum sem stað sem hægt er að fá hjálp. Spjallstofan kemur auðvitað ekki í staðinn fyrir námskeið. Það gerist þó oft að eitthvað vefst fyrir manni, jafnvel þótt maður sé búinn að fara á námskeið og þá er gott að vita um stað þar sem hægt er að henda inn fyrirspurn og fá skjót svör. - Mér þætti líka mjög gaman ef lengra komnir eTwinnarar deildu reynslu sinni um hvað hefði gengið vel og hvað hefði "floppað" hjá þeim.

Með góðum kveðjum að austan,

Sigrún

Fyrsta kynningin

Sæl og blessuð,

Ég var að koma úr kynningarferð um Tröllaskaga þar sem ég fór í Menntaskólann og í Grunnskóla Fjallabyggðar.  Óhætt er að segja að áhugi á e-twinning er mikill þarna á skaganum.  Í menntaskólanum eru menn að leggja af stað í ýmsa vinnu tengda nýjum námsvísi og e-twinning er tvímælalaust verkfæri sem hentar í þá vinnu.  Ný kennsluaðferð og ný nálgun á viðfangsefni.

Í grunnskóla Fjallabyggðar kom ég inn á kennarafund og voru kennarar áhugasamir enda þegar í vinnu með skóla í Írlandi þar sem vantar kannski einhvern grunn til að byggja á.  E-twinnig er einmitt sá gluggi sem þeir eru að leita að.  Geta bæði unnið verkefnið sem er afar áhugavert í e-twinning og auk þess bætt við skólum víðs vegar að til að teygja anga sína víðar.

Ég vona að kynningin leiði til þess að kennarar prófi sig áfram og komist að því að þetta er ekki meiri vinna en þeir hafa lagt á sig hingað til, heldur aðeins öðruvísi.

 Ef vilji er fyrir hendi mun ég bruna aftur á skagann og vera með verklega kennslu í framhaldinu..

þar til síðar..

 Bibbi

Netnámskeið á sænsku

Námskeiðið fjallar um margmiðlun og kennslu. Tilvalið fyrir kennara í norrænum málum.

Þátttakendur þurfa að vera skráðir í eTwinning -- ef þú ert ekki skráð/ur fer skráning fram á etwinning.net

Sjá nánar í þessari auglýsingu frá sænsku landskrifstofunni:

Auglýsing (.pdf, 1224k)

 

eTwinning netnámskeið

Heil og sæl, íslenskir eTwinnarar

Fyrir nokkrum dögum var ég að ljúka netnámskeiði hjá eTwinning - "Learning Event" og það var hreint alveg frábært. Öll uppsetning og skipulag var til fyrirmyndar og leiðbeinendur brugðust fljótt við spurningum og athugasemdum. Auk þess tókst þeim nokkuð sem allir fjarkennarar láta sig dreyma um en tekst því miður ekki alltaf: að stofna samfélag. Ég var í vinnuhópi með kennurum frá Þýskalandi, Ítalíu, Tyrklandi og Litháen. Samstarfið gekk mjög vel og við höfðum lífleg samskipti á vinnusvæðinu okkar. Verkefnin voru einnig þannig hönnuð, að við urðum að vinna saman. Ég taldi mig nú vita talsvert um eTwinning þegar ég byrjaði á námskeiðinu, en komst að raun um að það var ýmislegt merkilegt sem ég var ekki búin að uppgötva. Ég hvet ykkur til þess að kíkja á "Learning Events" "Heima" á "Desktop-inu" ykkar og sjá hvað er í boði. Og ekki er verra að þessi námskeið eru alveg ókeypis.

Með góðum kveðjum úr blíðunni á Austurlandi frá Sigrúnu  

Ambassadör... Norðurland hið Eystra

Góðan daginn,

nú er maður nýorðinn ambassadör eða sendiherra eTwinning en ekki er það samt komið í gagnið að setja upp sendiráð hér fyrir norðan þannig að maður verður að nýta eigin íbúð, bíl og síma í upphafi en þetta stendur allt til bóta og eflaust verða byggð sendiráð í hverjum landssexungi þegar fram líða stundir eins og Íslendingum einum er lagið.  Við ætlum samt að byrja smátt og hefjast handa með sendiherra og fá sendiráðin e.t.v. síðar.   -  miklu síðar..

En sendiherrastaðan hefur aðeins setið á hakanum frá fræðslufundinum vegna Comeniusarverkefnis í Ungverjalandi en starfið hefst formlega á morgun þegar ítrekunarpóstur verður sendur vítt og breitt um hið ægifagra norðurland auk þess sem fyrsti póstur fer auk þess á þá sem ekki hafa fengið áður. 

Stefnan er sett á að kynna e-twinning í upphafi nóvember á fullu gasi og hafa restina af nóvember sem tíma til að ráðleggja í gegnum upplýsingarmenntarkerfi sem hægt er að nota t.d. glæruskipti, podcast og fleira.

Ég veit að mín bíða skemmtilegir fundir með skemmtilegu fólki sem fær vonandi einhverja brennandi löngun til að æða um sléttar etwinnings og finna sér skemmtileg verkefni til að vinna að með samstarfsskólum sem brenna í skinninu að vinna með íslensku menntafólki.

Bestu kveðjur úr ógurlegri blíðu á Akureyri.. en ekki hvað..

 Bibbi, sendiherra e-twinning á Norðurlandi hinu Eystra.

Frá eTwinning fulltrúa á Suðurnesjum og á Vesturlandi

Nú er fyrsta eTwinning kynningin mín að baki. Í dag fór ég á leikskólann Holt í Reykjanesbæ og fræddi og sýndi starfsmönnum þar hversu áhugaverður vettvangur eTwinning er. Leikskólakennararnir voru mjög áhugasamir og fannst mikið til koma.

Ég kynntist eTwinning af eigin raun á síðasta skólaári þegar ég sótti eTwinning námskeið í Háskóla Íslands. Það var mjög áhugavert og stofnaði ég strax mína eigin síðu á eTwinning vefsvæðinu og byrjaði í mína fyrsta eTwinning verkefni með 10 skólum í Evrópu von bráðar. Verkefnið okkar er um matarmenningu í þátttökulöndunum og er mjög skemmtilegt.

eTwinning er ekki eingöngu samstarfsvettvangur til þess að vinna verkefni með nemendum og kennurum í Evrópu heldur er þar einnig hægt að sækja fræðslu og læra meira sem kennari. eTwinning býður upp á rafræn fjarnámskeið, spjallþræði um allt sem tengist námi og kennslu og þar er einnig að finna verkefnabanka sem allir kennarar geta bæði sótt í eða deilt eigin verkefnum með öðrum.

Kveðja,
Guðný Ester Aðalsteinsdóttir
Reykjanesbæ

Fyrsta blogg fullrúa eTwinning á Vestfjörðum

Ég er að taka mín fyrstu skref sem fulltrúi eTwinning, það er hrikalega spennandi en um leið svolítið ógnvekjandi. Ég fæ tækifæri til að kynnast fullt af fólki, ferðast og breiða út boðskapinn.
Í fyrsta sinn sem ég heyrði um eTwinning var fyrir tæpum 3 árum þegar ég fékk tölvupóst þess eðlis að það átti að bjóða tveimur kennurum að fara á eTwinning ráðstefnu til Póllands, ég sótti um af rælni og bjóst ekki við miklu. Það er óhætt að segja að ég hafi orðið mjög hissa og glöð þegar ég fékk símtal og mér tjáð að ég hefði verið valin til að fara út. Síðan þá hefur ekki verið aftur snúið, ég er gjörsamlega fallin fyrir eTwinning. Mér finnst það svo frábær leið fyrir kennara til að deila og læra af öðrum.

Nú þegar ég byrjaði að læra að verða fulltrúi þá komst ég að því að á síðu eTwinning er gagnabanki fyrir alls kyns verkefni sem kennarar geta deilt með hvor öðrum, vissuð þið það?

Kveðja frá Súgandafirði
Katrín Lilja Ævarsdóttir

eTwinning-vikur fram í desember

Mentorar eTwinning - Ertu byrjandi? Finndu íslenskan mentor. Ertu með reynslu af eTwinning? Hvernig væri að gerast mentor fyrir aðra sem eru að byrja?

iPod Shuffle fyrir fjóra eða fleiri kennara sem nýskrá sig eða skrá sig í verkefni

Ráðstefna og verðlaunahátíð eTwinning á Íslandi - fyrirlestrar, vinnustofur og verðlaun í landskeppni eTwinning

Nánari upplýsingar um eTwinning-vikurnar hérna